A iniciativa inclúese no Plan I+D+i da Xunta e busca impulsar a "competitividade" galega no ámbito da Biomedicina

SANTIAGO DE COMPOSTELA, 28 Mar. (EUROPA PRESS) -

A Consellería de Sanidade incorporará dous investigadores con "ampla experiencia internacional" para que dirixan as áreas de oncoloxía molecular e imaxe e a de investigación xenética aplicada en cancro, respectivamente.

Para iso, o departamento autonómico realizou unha convocatoria internacional --que se pode consultar na páxina web do proxecto Iman-- coa que amplía ao nivel "mundial" as actuacións en captación de talentos para os centros do Sistema Sanitario Público de Galicia.

Desta forma, a Xunta pretende impulsar a "competitividade" e o "desenvolvemento" de Galicia no ámbito da Biomedicina e as Ciencias da Saúde, destacou a Consellería que dirixe en funcións María José Louro.

Posteriormente, indicou que o Programa Iman --que se inscribe dentro do Plan Galego de I+D+i-- terá difusión internacional a través da publicación dos estudios nas principais revistas científicas.

MELLORAR O DIAGNÓSTICO

Segundo explicou Sanidade, os traballos nestes dous campos da medicina teñen unha importancia "moi alta" para desenvolver "mellores métodos" diagnósticos nun grupo de patoloxías que ten "gran frecuencia" e gravidade.

A efectividade dos tratamentos e a calidade de vida "adoitan estar en relación directa" cun diagnóstico precoz, resaltou. Por iso, a investigación é unha das liñas "máis prometedoras para xerar coñecemento", concluíu.