SANTIAGO DE COMPOSTELA, 18 Jul. (EUROPA PRESS) -

A asociación cultural As Estrugas creou un xampú e un xabón artesán a base de estrugas que aproveitan as propiedades hidratantes e dermatolóxicas desta planta, abundante na provincia de Ourense.

Así, o profesor de Cociña do Instituto de Ensino Secundario de Vilamarín (Ourense), Martín Álvarez, que preside este colectivo, explicou que o proceso de fabricación se baseou na recollida, a través de entrevistas a persoas maiores, dunha "tradición moi ourensana", que consiste en cocer estruga morta e posteriormente lavar o cabelo co líquido resultante.

A esta loción atribúenselle propiedades como fortalecer o pelo e combater a caspa, a graxa e a caída do cabelo. "Forma parte dunha longa lista de remedios", destacou, tras o que indicou que ambos os dous produtos se desenvolveron en colaboración co laboratorio Natural Carol.

Por unha parte, o "xampú de estrugas", que está composto por extracto de estruga branca --non pica--, presenta unha textura "tipo xel, de cor amarela verdosa con lixeiro aroma a cítricos", apuntou Álvarez, tras o que engadiu que ten calidades hidratantes, purificantes e tonificantes. "Tamén é recomendable para combater a caída do cabelo", apostilou.

Por outra banda, detallou que a xabón artesán de estrugas emprega "o modo en que se facían as xabóns sólidas antigamente nas aldeas", para o que utiliza eslamiada, graxa, estruga e aceite de oliva con máis dun ano --que é cando empeza a perder propiedades gastronómicas--.

Desta forma, atribuíu ao produto resultante resultados positivos en tratamentos dermatolóxicos, como a curación da acne, de imperfeccións da pel e ezemas.