A convocatoria, que impulsa accións que utilicen as TIC, recolle a posibilidade de conceder anticipos de ata o 80% da contía

SANTIAGO DE COMPOSTELA, 25 Oct. (EUROPA PRESS) -

A Consellería de Economía e Industria publicou esta semana a convocatoria dunha nova liña de axudas para o financiamento de proxectos de innovación tecnolóxica relacionados co Xacobeo 2010, que permanecerá aberto ata o próximo 21 de novembro e ten unha dotación dun millón de euros.

Segundo destacou o departamento, "o Goberno galego está a acumular esforzos para aproveitar a oportunidade que supón o Xacobeo 2010 para Galicia". "Máis alá do fito relixioso e turístico, o Ano Santo é unha ocasión para impulsar o desenvolvemento económico", apuntou.

Por iso, subliñou que o obxectivo é o "fomento de proxectos que entroncan coas prioridades do Plan Galego de I+D+i 2006-2010 (Incite)", como o "impulso" do crecemento económico e social da comunidade mediante a "mellora" da súa capacidade científico-tecnolóxica.

Os beneficiarios destas subvencións serán empresas de carácter privado que teñan o seu domicilio social ou algún centro de traballo en Galicia e utilicen as Tecnoloxías da Información e das Comunicacións (TIC) "para aumentar a calidade da oferta turística, das actividades ou dos servizos relacionados co Xacobeo", explicou.

Así, as bases da convocatoria recollen a posibilidade de conceder anticipos de ata o 80 por cento da contía da axuda, de forma que as compañías reciban "parte da subvención antes de efectuar o gasto", sen necesidade de presentar garantía a favor da Xunta.

PROXECTOS SUBVENCIONABLES

En concreto, considéranse proxectos "subvencionables" aqueles que poidan dar soporte mediante as TIC a servizos de valor engadido para peregrinos e outras persoas interesadas no Xacobeo, entre os que Economía e Industria aludiu a dispositivos móbiles, de localización e xeoreferenciación, redes sociais e web 2.0.

Tamén apuntou ao sector audiovisual de promoción ou soporte do Ano Santo e a iniciativas que permitan mellorar as tecnoloxías de restauración e estudio de elementos históricos, artísticos e culturais.

A contía das axudas concedidas será destinada ao gasto en persoal técnico con relación laboral coa empresa, ao de persoal adicional técnico-científico, servizos e colaboracións externas --ata un máximo do 20 por cento--, material, subcontratacións de universidades, centros tecnolóxicos e de investigación.

Ao respecto, indicou que "unha mesma entidade non pode exceder os 500.000 euros durante os tres últimos anos". Non obstante, a cantidade "pode acumularse con outras subvencións compatibles", resaltou Economía e Industria.