SANTIAGO DE COMPOSTELA, 8 Jul. (EUROPA PRESS) -
A delegada da Consellería de Innovación e Industria en Pontevedra, Montserrat Prado, propuxo hoxe ao sector do comercio minorista, nunha reunión en Vigo, desenvolver unha plataforma de venda en liña.
Esta iniciativa está pensada para poñer a disposición do conxunto do pequeno comercio unha marca común baixo a que comercializar a súa mercadoría a través de internet apostando pola introdución das novas tecnoloxías e a modernización do sector.
Durante estes encontros que se están a desenvolver esta semana por toda Galicia o departamento autonómico expón ao comercio minorista a necesidade de internarse na comercialización a través da rede como unha estratexia conxunta entre a administración e o sector privado para traballar na súa modernización e adaptación ás necesidades do novo mercado.
Neste sentido, Innovación e Industria destaca sobre todo a importancia de que este proxecto se leve a cabo coa presenza en conxunto de todo o comercio galego para poder desenvolver unha única marca que identifique e ampare ao sector.
Engadiu que o papel deste departamento autonómico será o de creación, desenvolvemento e promoción da plataforma, así como de asesoramento continuo aos comerciantes que se sumen a esta iniciativa.