SANTIAGO DE COMPOSTELA, 27 Ene. (EUROPA PRESS) -
O presidente da Xunta, Alberto Núñez Feijóo, anunciou este luns a convocatoria durante o primeiro trimestre deste ano de todos os programas e liñas de actuación en materia de vivenda, por valor de máis de 34 millóns de euros e que beneficiarán a unhas 6.000 familias. Esta contía, explicou, supón un incremento do 11 por cento con respecto ao ano anterior.
En concreto, esta mesma semana convocaranse as axudas dirixidas á adquisición de vivenda, tanto para menores de 35 anos en concellos de menos de 5.000 habitantes, como as de centros históricos.
Así mesmo, entre febreiro e marzo convocaranse as ordes de apoio á rehabilitación de vivendas, entre as que destacan o Rehaluga, as Áreas de Rehabilitación Integral, o Programa de Infravivenda, o Programa de Vivendas de mestres e as axudas de promoción de vivendas para o aluguer e para o aluguer de persoas maiores e con discapacidade.
Ademais, como novidade e co obxectivo de facilitar aos cidadáns un mellor coñecemento das axudas convocadas, Núñez Feijóo explicou que cada grupo se publicará nun mesmo texto de convocatoria.
CABANA DE BERGANTIÑOS
Núñez Feijóo visitou este luns as obras de rehabilitación das antigas vivendas de mestres de Cabana de Bergantiños (A Coruña) para vivendas de aluguer.
Neste marco, o presidente galego precisou que, grazas ás tres convocatorias do programa de vivendas de mestres, xa se rehabilitaron 87 en 32 concellos, cun investimento de 3,3 millóns. Este ano, ao longo de febreiro e marzo, destinaranse 2,38 millóns a este ámbito, o que supón un 48 por cento máis que en 2019.
Estas vivendas adxudicaranse en réxime de aluguer con condicións vantaxosas a unidades de convivencia que non superen o IPREM. Para a concesión da axuda de rehabilitación, así mesmo, é necesario que o concello teña veciños inscritos no Rexistro Único de Demandantes de Galicia.
