O Consello Galego de Consumidores e Usuarios elixe por unanimidade a Aurora Lamas como presidenta

Actualizado: sábado, 6 mayo 2006 14:09

SANTIAGO DE COMPOSTELA, 6 May. (EUROPA PRESS) -

O Consello Galego de Consumidores e Usuarios (CGCU) elixiu por unanimidade a Aurora Lamas como presidenta do órgano autónomo e consultivo incluido dentro do Consello Económico e Social de Galicia.

Aurora Lamas, que xa exerceu de presidenta do CGCU durante os últimos anos, mostrouse agradecida polo apoio recibido e con moita ilusión para seguir participando de activa na vida social galega defendendo os dereitos dos consumidores e usuarios de Galicia.

Como vicepresidenta foi elixida Otilia Novegil Villanueva e como membros da comisión permanente do Consello de Consumidores e Usuarios de Galicia María Luisa Lloves Boo, Victoria Pardo e Pilar Iglesias.

O labor dos novos membros será velar polas necesidades do consumidor nun mundo cada vez máis globalizado e, como recoñecía Aurora Lamas esta semana, no que o consumo está máis universalizado e extendido a todas as parcelas da vida dos cidadáns.

A nova presidenta do Consello Galego de Consumidores e Usuarios fixo estas declaracións na súa intervención no Parlamento de Galicia na Comisión de Estudo de Reforma do Estatuto. Aurora Lamas presentou durante esta sesión as propostas da federación de consumidores galegos para a elaboración do próximo Estatuto de Autonomía de Galicia.