SANTIAGO DE COMPOSTELA, 29 Abr. (EUROPA PRESS) -
A Consellería de Educación vén de convocar prazas e axudas nos centros residenciais docentes da Coruña, Ourense e Vigo para cursar estudos de ensinanzas postobrigatorias non universitarias e de réxime especial no vindeiro curso.
Este curso, un total de 780 estudantes están inscritos nos centros residenciais docentes da comunidade. Así, no da Coruña hai capacidade para 520 alumnos e teñen praza 400. En Ourense existen 260 prazas das que 206 están cubertas, mentres que en Vigo hai inscritos 174 estudantes nas 194 dispoñibles.
Deste xeito, o número de prazas de residencia que se convoquen para o vindeiro curso serán as correspondentes ás vacantes que se produzan.
Nesta convocatoria a principal novidade é que os residentes nestas instalacións poderán estudar en centros privados concertados. No caso de que a solicitude sexa feita coa finalidade de cursar especialidades que non se imparten nos IES adscritos ao centro residencial, a adxudicación da praza será provisional ata que o interesado presente o xustificante de que foi admitido no instituto no que se imparte a citada especialidade, que terá que ser da mesma localidade que o centro.
O prazo de presentación de solicitudes é de 30 días naturais contados a partir do pasado 25 de abril e establecerase un periodo extraordinario na primeira quincena de setembro destinado ás ensinanzas autorizadas pola Administración con posterioridade á publicación da convocatoria de onte, así como para os ciclos formativos.
Para poder optar á praza os aspirantes deberán reunir os requisitos académicos previstos na Loxe así como acreditar as circunstancias que impiden a súa escolarización nun centro público. Para conceder as axudas teranse en conta criterios socio-económicos e académicos, sen esquecer situacións especiais como a orfandade, ser fillo de emigrantes ou circunstancias familiares moi graves.