SANTIAGO DE COMPOSTELA, 8 May. (EUROPA PRESS) -
A Consellería de Educación e Ordenación Universitaria investirá un orzamento total de 1.380.789,47 euros na licitación das obras de reforma do Centro de Educación Infantil e Primaria (CEIP) de Prácticas López Ferreiro de Santiago de Compostela, segundo anunciou polo sistema de concurso aberto e de tramitación de urxencia.
Este centro foi creado en 1967 e naceu como edificio anexo á Escola Universitaria de Maxisterio. A actuación que se leva agora a cabo supón a independización deste colexio con respecto ás instalacións universitarias, para o que se procederá a realizar melloras no sistema eléctrico e outros servizos comúns.
Ademais, nas obras de reforma renovarase a carpintería de madeira, pavimentaranse de novo os aseos, limparase a fachada e demais, todo isto, de acordo coa normativa vixente.
As empresas que opten á execución desta actuación disporán de 13 días para dirixir as súas ofertas á Consellería de Educación e Ordenación Universitaria e o prazo de execución das obras é de cinco meses.
