5 de diciembre de 2020
23 de septiembre de 2006

Expertos destacan a necesidade de promover a actividade física dende o núcleo familiar para frear a obesidade infantil

O 16% dos nenos españois de entre 6 e 12 anos son obesos, o que algúns expertos cualifican de "epidemia"

A CORUÑA, 23 Sep. (EUROPA PRESS) -

Expertos en medicina e nutrición infantil incidiron hoxe na necesidade de promover a práctica de actividades físicas e deportivas dentro do núcleo familiar co obxectivo de frear a obesidade infantil.

Así o manifestaron na xornada sobre obesidade infantil que a Fundación María José Jove celebrou hoxe na Coruña. Para Luis A. Moreno, coordinador do proxecto europeo Helena, "é necesario establecer programas de tratamentos para nenos que inclúan actividade física, dieta e axuda psicolóxica".

O proxecto Helena, promovido pola Comisión Europea, traballa dentro deste campo e inclúe o desenvolvemento dun programa de intervención que ten como obxectivo a mellora do estilo de vida dos adolescentes.

Neste sentido, Moreno apuntou que "traballan para definir o Proxecto EVASYON que se aplicará en 5 hospitais españois e que será financiado polo Ministerio de Sanidade".

Pola súa parte, a delegada da Consellería de Sanidade e experta en nutrición, María Ausencia Tomei, explicou as claves do Programa PASEA, unha iniciativa da Xunta para promover estilos de vida saudables e de prevención de obesidade.

Na súa intervención, Tomei destacou que "entre os principais obxectivos deste programa están o de mellorar o coñecemento do problema no ámbito de Galicia e o de educar a poboación, para inverter a tendencia crecente de taxas de sobrepeso".

Durante toda a mañá de hoxe os máis pequenos aprenderon cáles son as claves para previr a enfermidade. Para iso, educadores sociais, psicólogos e terapeutas prepararon numerosas actividades repartidas en dous talleres: un sobre Actividade Física Saudable e outro sobre Alimentación Saudable.

EPIDEMIA

Moitos expertos cualificaron de "epidemia" esta patoloxía, cada vez máis frecuente entre a poboación infantil. Neste sentido, Rafael Tojo, catedrático de Pediatría e membro da Unidade de Investigación en Nutrición e Desenvolvemento Humano de Galicia, apuntou que no mundo hai máis de 155 millóns de nenos con sobrepeso, 14 deles na Unión Europea, dos cales 3 millóns son obesos.

Tojo explicou que en España, a prevalencia de obesidade nos nenos se triplicou dende 1984, pasando do 5 ao 16%, "o que produciu que o noso país ocupe os primeiros xunto a Malta, Portugal, Italia, Grecia e Reino Unido do ranking europeo de obesidade".