SANTIAGO DE COMPOSTELA, 27 Mar. (EUROPA PRESS) -
O Colexio Oficial de Arquitectos de Galicia tentará impulsar un debate social sobre o Urbanismo Sostible en Galicia e, en concreto, en Santiago de Compostela. A idea de impulsar este blog -- www.lacoctelera.com/territoriantecompostelano--, xordeu pola necesidade de crear un foro no que todos os cidadáns poidan expresarse libremente e manifesten a súa opinión sobre a cidade e os barrios nos que residen.
Segundo sinala nun comunicado a autora deste blog, Teresa Banet --arquitecta da Delegación de Santiago do COAG--, "o urbanismo sostible non ten nada que ver co que se fai en Galicia". Coa posta en marcha desta iniciativa preténdese que os cidadáns debatan acerca de se existe democracia urbanística nos plans xerais ou non. Teresa Banet afirma que en materia de urbanismo a participación cidadán é fundamental e que é necesario que a sociedade esté informada sobre todo o relacionado co mesmo.
No pouco tempo de vida que ten o blog xa se poden extraer opinións importantes. Así, é significativo que a maioría dos cidadáns non se identifican co barrio no que viven e o descenso de poboación que sufre Santiago desde hai anos.
A autora do blog irá desenvolvendo diferentes temas de interese urbanístico para que se produza o debate entre profesionais da arquitectura e os cidadáns en xeral. De momento, existen dous temas que xa están recibindo as opinións de quen visita a páxina: "Debemos coñecer ao cidadán" e "¿Por qué a cidade perde poboación?".
Dependendo da acollida que teña este blog, así como do número de opinións vertidas nel, a autora do mesmo xa pensa en publicar todas estas opinións nun libro, xa que de momento "non existe un foro no que todos poidan opinar sobre os temas que preocupan a sociedade neste ámbito".
