A CORUÑA, 8 Feb. (EUROPA PRESS) -
O voceiro do PP na Deputación da Coruña, Xosé Luis Torres Colomer, e o deputado autonómico Carlos Negreira solicitarán que a Xunta, Fomento e o organismo provincial coruñés financien a supresión da peaxe da Barcala. Os representantes populares defenderán a mesma proposta que anunciou o seu compañeiro de partido en Pontevedra, Rafael Louzán, para a peaxe de Rande.
Segundo informou o PP, Colomer e Negreira reclamarán para A Coruña un sistema de financiamento alternativo que consistirá en que a Deputación e a Xunta deberán aportar o 25% do coste total, a mesma cantidade que financiaban ata o de agora en concepto de bono-peaxe, e incorporariase o Ministerio de Fomento que faría fronte ao outro 50% restante.
A intención dos representantes populares da Coruña é acadar con este acordo que a supresión se faga efectiva "canto antes", e se poidan retirar as casetas de cobro da peaxe definitivamente. Así, recordan que cando se estableceu o sistema do bono-peaxe "anunciouse que sería unha medida provisional".
O deputado Carlos Negreira recorda que o titular do Executivo galego, Emilio Pérez Touriño, e o presidente do Goberno, José Luis Rodríguez Zapatero, anunciaron que no mes de xaneiro, como moi tarde, daríase unha solución á peaxe da Barcala.
O representante popular asegura que a día hoxe non existe "ningún compromiso en firme" e precisa que noutras peaxes de comunidades autónomas como Castela León, Asturias e Andalucía se ofertaron "solucións similares" á que plantexa o PP.
Negreira demanda tamén una "resposta clara e definitiva" do titular do Executivo galego sobre cal será a súa postura e recorda que a aceptación desta proposta beneficiará a uns 15.000 vehículos que empregan a diario o tramo da Barcala.
