Representantes veciñais de toda Galicia súmanse ao encerro dos veciños e critican que o alcalde Manuel Vázquez marche de vacacións
OURENSE, 12 Abr. (EUROPA PRESS) -
O Valedor do Pobo recomendou ao Concello de Punxín que "con urxencia e de oficio" determine a responsabilidade económica e posible compensación "derivada da subministración de auga contaminada, do seu uso para fins limitados e da falta de axeitada depuración, no caso de confirmala," ademais de instar a que de oficio tamén "reclame á empresa concesionaria a posible compensación ou devolución do cobrado indebidamente".
O escrito do Valedor chegou á comisión veciñal da auga e ao Concello de Punxín o venres día 11. Os veciños manteñen o seu encerro no salón de plenos, no soto, pola falta de resposta do alcalde, Manuel Vázquez, á súa petición de redución de taxas polo servizo da auga, pois mantense o 300% sobre o valor real estimado "nun municipio con poucos centos de habitantes, poucos recursos e con poboación envellecida", segundo o texto.
No seu escrito, o valedor do Pobo en funcións, José Julio Fernández Rodríguez, detalla a documentación reunida dende que comezou a investigar de oficio o tema da auga en Punxín, a raíz dunha información en prensa escrita, como a relativa ás análises de arsénico pagadas polos veciños, que o detectaron nun pozo de captación en 2010 aínda que "non se tomaron medidas ata que se deu a coñecer en medios de comunicación en agosto de 2012".
Segundo a documentación achegada polo propio concello e a comisión veciñal da auga, o alcalde soubo da contaminación en abril de 2011 e a empresa concesionaria, Aquagest, pechou o pozo, para abrilo poucos meses despois. Tamén se detectou arsénico noutros dous pozos, o que levou a restrinxir o uso da auga para consumo alimentario e a abastecer de auga embotellada a poboación afectada.
DEVOLUCIÓN DO COBRADO DE MÁIS
Os 11 folios do informe do Valedor do Pobo, inclúen a análise dos custos do servizo que, segundo conclúe, indican que a empresa "só inverteu o 40 por cento do comprometido ao asinar o contrato de xestión", segundo un informe da comisión que reclamou, ante o Valedor "o reintegro do cobrado de máis pola empresa e o axuste da taxa ao custo real, ademais da volta á xestión directa".
O terceiro elemento reclamado, a volta á xestión directa, foi acordada nun pleno de xaneiro de 2014, despois de que Aguagest e o concello cancelasen de mutuo acordo o contrato para 25 anos que asinaran, e tras quedar deserto o novo concurso convocado para seguir coa xestión indirecta.
Segundo os informes recibidos polo Valedor, o prezo da taxa "polo saneamento é considerablemente superior ao da propia auga o que fai necesario que se aclare que o funcionamento do servizo é óptimo", en relación á depuración pois o concello indica que o servizo comprende mantemento de redes de saneamento, foxas existentes, limpeza de foxas e xestión de lamas "pero non menciona a depuración que debería ser óptima porque o prezo cobrado así o esixe", conclúe.
Os veciños, segundo o informe, presentaron 25 reclamacións de devolución de cobramentos indebidos ante a empresa Aquagest "e aínda non recibiron resposta".
En relación á contaminación natural por arsénico do chan, o Valedor indica que se detectou noutros dous pozos e nun deles, o de Vilar, permanece.
UN MES PARA RESPONDER
O Valedor do Pobo recomenda ao Concello de Punxín que "investigue o estrito cumprimento por parte da empresa Aquagest, das súas obrigas" derivadas das previsións dos estudios, aprobados polo concello e recollidos "previsiblemente" no contrato de concesión.
"No caso de que resulte un incumprimento, que esixa a devolución das cantidades cobradas de forma indebida aos veciños e ao concello, e no prazo dun mes deberá dar conta a esta institución da aceptación da recomendación e das medidas adoptadas, no seu caso", remata.
QUINCE DÍAS DE ENCERRO
O encerro iniciado polos veciños de Punxín hai quince días contou hoxe co apoio de representantes veciñais de Ferrol, A Coruña, Lugo, Cangas, Ourense, Vigo, Pontevedra e Santiago, ademais de representantes da Confederación Galega de Asociacións de Veciños, o presidente da cal Jesús Vázquez, dirixiuse aos encerrados para expresarlles o seu apoio ante as reclamacións de "auga de calidade e taxas xustas".
Segundo Vázquez, os veciños de Punxín "só reclaman ser oídos" e que se busquen solucións polo que "non son eles os que deberían estar" a facer o encerro, "senón os responsables institucionais que poden solucionar este problema, como representantes da Xunta de Galicia e da Deputación, entre outros, sexan da cor política que sexan porque a auga non ten cor".
Directivos veciñais expresaron ademais a súa indignación ante a ausencia do alcalde Manuel Vázquez, que segundo dixeron nas súas intervencións, saíu este mesmo sábado de vacacións para pasar quince días nas illas Canarias.
