UVIÉU, 2 Jul. (EUROPA PRESS) -
El Conseyu de Gobiernu aprobó esti xueves una prórroga nueva de la moratoria que caltien la suspensión de les autorizaciones pa l'apertura d'establecimientos de xuegu nel Principáu d'Asturies.
L'Executivu yá alcordara dos prórrogues el 26 de marzu y 14 de payares de 2019 pasaos. La decidida esti xueves, informa'l Principáu en nota de prensa, respuende a "la dificultá pa predicir les consecuencies del estáu d'alarma, qu'obligó al zarru temporal de los establecimientos de xuegu". Pretenden evaluase cuestiones como la repercusión d'esti parón sobre la viabilidá de dalgunos de locales o los efectos de midíes sanitaries como la llimitación d'aforos o l'establecimientu de distancies mínimes de seguridá.
La Conseyería de Facienda trabaya nel decretu que va regular l'actividá de xuegu y apuestes n'Asturies. Ello ye que la propuesta inicial ta en fase d'información pública dende'l 25 de xunu. Una vez qu'acabe esti procesu, el testu va sometese al Conseyu del Xuegu, del que formen parte les alministraciones locales, el colectivu de ludópates, el sector empresarial, sindicatos, el Conseyu de la Mocedá, asociaciones de consumidores y usuarios y la mesma Alministración autonómica. Depués, va ser el turnu del Conseyu Consultivu, como pasu previu a l'aprobación final pol Gobiernu.
Na propuesta de decretu sometida a información pública establezse que'l númberu d'establecimientos autorizaos sía'l máximu -- un casino, 6 bingos, 28 salones de xuegu y 9 locales d'apuestes--. Namás podría aumentar poles llicencies pendientes de resolver nel ámbitu municipal y que foren solicitaes enantes del 26 de marzu de 2019.
Una vez resueltes estes solicitúes pendientes, quedaría afitada la cantidá final d'establecimientos. Igualmente, propónse que si se produciera'l zarru de dalgún d'estos locales, el máximu autorizáu tamién menguara nel mesmu númberu.
