14 de octubre de 2019
21 de julio de 2019

Berta Piñán va ser la conseyera de Cultura, Política Llingüística y Turismu

UVIÉU, 21 Jul. (EUROPA PRESS) -

Les dos conseyeríes nueves de Cultura, Política Llingüística y Turismu, per un llau, y Ciencia Innovación y Universidá, per otru, van tar ocupaes por Berta Piñán y Borja Sánchez, respectivamente.

El presidente del Principáu Adrián Barbón anunció esti domingu los miembros del so equipu, que va tar formáu por 5 muyeres y 5 homes, con militancia socialista pero tamién independientes, que van ocupar les diez conseyeríes, dos más que na llexislatura anterior.

La conseyera de Cultura nueva, Berta Piñán, ye académica de la llingua y una de les escritores de más prestixu de les lletres asturianes. Esti mesmu sábadu, nel actu de toma de posesión d'Adrián Barbón, la lliteratura de Berta Piñán tuvo presente al traviés de la llectura del so poema 'Una casa', lleíu xusto enantes de la intervención de Barbón.

Nél, hai una metáfora ente la construcción d'una vivienda, la mesma Asturies y la puesta en marcha d'un proyectu de vida compartíu. El poema yá se pudiera sentir nel Teatru Campoamor nuna ceremonia de los Premios Príncipe, cuando Felipe VI, daquella tovía príncipe, recitó unos versos del mesmu.

Barbón, que pretende que Turismu sía una Viceconsejería, esplicó sobre qu'estes competencies tean dientro de la Conseyería de Cultura que busca "poner en valir el patrimoniu cultural y llingüísticu" al empar que convertilo nun pegollu del sector turísticu.

Trátase d'un gobiernu renováu dafechu en comparanza cola llexislatura anterior y que, en palabres de Barbón, supón "una renovación xeneracional fonda" y un "apueste pola solvencia".

Los conseyeros van tomar posesión del cargu'l xueves próximu nun actu nel Salón Europa de la Xunta Xeneral. Nel parllamentu tamién va celebrase'l primer Conseyu de Gobiernu de la llexislatura como "xestu" a la institución y "a la historia d'Asturies", esplicó Barbón que recordó que'l primer Conseyu de Gobiernu de la historia autonómica celebróse na Xunta.

Barbón tamién esplicó que tien previstu'l 1 d'agostu caltener una xunta con empresarios y sindicatos p'afitar una propuesta asturiana sobre l'arancel ambiental. Per otru llau, en xunetu cuenta realizar la so primer visita institucional al conceyu más pequeñuu d'Asturies, el de Yernes y Tameza.

Con too, esti llunes Barbón tien per delantre dir a Madrid al debate d'investidura de Pedro Sánchez y el miércoles va acompañar a Javier Fernández a Galicia, onde va recibir la Medaya de la comunidá.