UVIÉU, 15 Nov. (EUROPA PRESS) -
La portavoz de Ciudadanos na Xunta Xeneral, Laura Pérez Macho, pidió esti vienres al Gobiernu del socialista Adrián Barbón tresparencia y llealtá pa negociar na Cámara'l proyectu de presupuestos de 2020, onde adelantó que val refugar "cualquier gastu superfluu" como "el bable".
En rueda de prensa en sede parllamentaria, Pérez Macho incidió na urxencia d'ellaborar un "analisis seriu" de la situación socioeconómica actual d'Asturies y el nivel de cumplimientu de los compromisos de tresferencia de cuantíes pendientes del Estáu pa poder "facer propuestes" a les cuentes pal añu próximu.
Según la diputada de la formación naranxa, la negociación presupuestaria nun puede llindase a alcuerdos "con pegatina", sinón que tienen de consensuase prioridaes pa garantizar el sostenimientu de los servicios públicos y inversiones posibles.
Asina, pide al Executivu qu'actúe con tresparencia na negociación, en vez d'entamar conversaciones "perbaxo la mesa", y igual "llealtá institucional" que demanda p'algamar "consensos" sobre les necesidaes de la comunidá.
Ente ún de los principales asuntos a analizar, la diputada de Ciudadanos señaló la financiación autonómica, alertando de "la deriva" del PSOE y les sos rellaciones con partíos nacionalistes y rexonalistes. "Nun creemos que los socios de Sánchez vaigan tar mui esmolecíos polos intereses d'Asturies na negociación de la financiación autonómica", dixo.
Amás, repitió la pitición que formuló nel plenu d'esta selmana al presidente pa qu'informe sobre si'l Principáu yá recibió la primer parte de los 120 millones de tresferencies prevista pa enantes del 10 de payares y qué previsiones de plazos tien pa la segunda parte, amás de pa los 80 millones que restaben relativos a entregues vinculaes al IVA.
Tamién quieren saber dende Ciudadanos si'l Gobiernu asturianu va cumplir los oxetivos d'estabilidá presupuestaria, atendiendo a les indicaciones de l'Airef, amás de si reformuló yá'l so plan económicu y financieru.
Pérez Macho resaltó la importancia del presupuestu, pa demandar, como portavoz de la tercer fuercia na Xunta Xeneral, que tanto l'Executivu como toles formaciones con representación parllamentaria se tomen "en serio" el debate pa llograr unes cuentes "que realmente contribuyan a sostenimientu d'unos servicios públicos de calidá agora y nel mediu plazu", que coles mesmes promuevan "l'actividá económica y l'empléu". Con too, aseguró que'l so grupu va ser lo más propositivu posible.
Ciudadanos propón priorizar inversiones dende'l consensu parllamentariu, señalando necesidaes urxentes na rede de carreteres, nel caltenimientu de centros escolares o'l desarrollu de la Zalia, amás de reclamar un plan estratéxicu de subvenciones, p'analizar cuantíes y oxetivos cumplíos y un plan de contabilidá analítica vixente en dos años.
Coles mesmes, la formación adelantó'l so refugu a "cualquier gastu superfluu", en referencia a la recuperación "de la CES" o "el bable"; y proponen analizar dende la "responsabilidá" y ensin "demagoxes" el gastu burocráticu de cuntar con ocho árees sanitaries, ensin qu'ello traiga'l pieslle de centros hospitalarios, pa llograr que los servicios "sían sostenibles".
