UVIÉU, 18 Ene. (EUROPA PRESS) -
La presidenta del PP asturianu, Mercedes Fernández, reivindicó'l so trabayu al mandu de los 'populares' y recordó que foi escoyida líder n'Asturies col votu del 90% de los militantes. Nesi sentíu, indicó que tomó les riendes del PP nun momentu difícil pero qu'ella supo construyir "dende cero" mentes qu'otros "saben coyer el relevu dende'l trabayu fechu".
Asina de contundente msotróse Fernández esti vienres nunes declaraciones distribuyíes pol PP y realizaes na primer xornada de la Convención Nacional del partíu que se celebra en Madrid.
Nesi sentíu, la líder de los 'populares' asturianos señaló que la Convención va ser "definitiva" pa marcar les llinies programátiques pa les elecciones de mayu y pa "escuchar y ufrir propuestes pa beneficiar a Asturies". Una rexón que, según señaló, quier que tenga un protagonismu "qu'hasta agora nun tuvo nel conxuntu d'España".
Per otru llau, indicó que la Convención va permitir "recargar les piles, qu'a dalgunos bona falta nos fai". Preguntada por estes palabres, respondió que "polos acontecimientos de recién como foron radiaos en directo nun tengo más qu'añadir".
Con too, reivindicó qu'ella ye la presidenta del PP asturianu depués d'un Congresu "llimpiu" onde salió escoyida con más del 90 por cientu de los votos. Un Congresu onde se celebraron les primeres primaries del PP asturianu nes qu'ella s'involucró, "porque yo creílo y voi siguir creyéndomelo".
Un congresu onde, recordó, hubo una dixebra "tarrecible" y ella lo que fixo foi construyir, porque "dalgunos sabemos construyir dende cero y otros saben coyer el relevu dende'l trabayu fechu".
