UVIÉU, 25 Feb. (EUROPA PRESS) -
La familia de Sheila Barrero, la moza que morrió'l 25 de xineru 2004 d'un tiru na nuca nel interior del so vehículu, a mediu camín ente la localidá llionesa de Vil.lablinu y Degaña, convocó pa esti vienres día 28 una concentración énte'l Palaciu de Xusticia d'Uviéu.
Va facelo en protesta pola decisión de la maxistrada titular del Xulgáu de primera Instancia y Instrucción de Cangas del Narcéa que decretó'l sobreseimientu provisional de la causa qu'investiga l'asesinatu.
Asina lo recueye la familia na páxina que tien abierta en Facebook. "Esti últimu golpe foi duru y cuesta ponese de pie pero nun queda otra que lluchar por dalgo que ye un derechu, por eso entamemos esta manifestación, vamos salir de la cai Concepción Arenal énte'l Palaciu de Xusticia n'Uviéu onde tien el so despachu la Fiscal Xefe, pa mostra-y publicamente el nuestru malestar col so proceder nel asesinatu de Sheila y a les 11.00 vamos salir escontra'l Tribunal Superior de Xusticia y ellí va lleese un manifiestu".
La Maxistrada decidió l'archivu de la causa al considerar que "de les dilixencies d'instrucción practicaes nun se pudo comprobar al investigáu, nin a nenguna otra persona, nel vehículu de la moza na mañana del so homicidiu".
"La presencia d'una fibra de la chaqueta del investigáu sobre una bufanda depositada nos asientos traseros del vehículu nun permite asitialu ente les 08.15 y les 10.00 hores nel vehículu de la moza, porque, según dellos testigos, tuviera en delles ocasiones nel interior del mesmu, pudiendo depositase la fibra en cualesquier d'eses otres ocasiones anteriores", señala l'Autu.
