UVIÉU, 18 Sep. (EUROPA PRESS) -
El portavoz de la Xunta pola Defensa de la Llingua Asturiana (XDLA), Carlos Pulgar, afirmó que dende la so organización tán "espectantes" énte la propuesta de Podemos al restu de grupos pa reformar l'Estatutu. "Por fin s'empiecen a mover coses nesta llexislatura", indicó.
En declaraciones a Europa Press, Pulgar posicionóse sobre la propuesta de Podemos pa entamar los trabayos qu'acaben na reforma del Estatutu d'Autonomía. La formación morada propón constituyir un grupu de trabayu qu'a lo llargo del últimu trimestre de 2020 analice les posibles mayoríes en cuestiones como la oficialidá del asturianu y del gallego-asturianu. Nel siguiente períodu de sesiones ellaboraríase un dictame de reforma del Estatutu pa entamar el procesu'l 25 de Mayu de 2021.
Énte eso, dende la XDLA afirmen tar "espectantes" porque la propuesta de Podemos supón que "por fin s'empiecen a mover coses nesta llexislatura, porque'l tiempu pasa y los derechos llingüísticos siguen ensin reconocese".
Sobre les posibles mayoríes, Pulgar esplica que nestos momentos ye una cuestión "de dominiu públicu" qu'existe una mayoría amplia pa reconocer la oficialidá "y que pa facer camín lo que hai ye que dar pasos de verdá los que pueden y quieren dalos".
"Tamos viendo una demanda constante y creciente na xente y nes instituciones, muncho conceyos tán na reivindicación dende fai años y más que se van siguir sumando", sentenció.
