Barbón destaca que los resultaos muestren "l'aciertu" nel procesu de cambiu de los socialistes asturianos
UVIÉU, 11 Nov. (EUROPA PRESS) -
El secretariu xeneral de la Federación Socialista Asturiana (FSA-PSOE) y presidente del Principáu, Adrián Barbón, indicó esti llunes n'Uviéu que van apoyar la decisión que tome la Comisión Executiva Federal de cara a les negociaciones y asina poder formar Gobiernu "lo más ceo posible".
Coles mesmes, culpó al "ablancamientu" de la ultraderecha" qu'al so xuiciu realizaron PP y Ciudadanos, lo que según Barbón llevó al puxu de Vox nestes elecciones. El partíu de Santiago Abascal convirtióse esti domingu na tercer fuercia política al algamar los 52 diputaos.
Asina lo señaló'l líder socialista depués de la xunta de la Comisión Executiva Autonómica de la Federación Socialista Asturiana (FSA-PSOE) y depués de que'l ministru de Fomentu en funciones y secretariu d'Organización del PSOE, José Luis Ábalos, alvirtiera esta mañana de que'l so partíu nun va apostar pola gran coalición col PP y dexara claro que nun ve otra alternativa qu'un gobiernu progresista.
Nesi sentíu, Barbón resaltó la necesidá de qu'exista "un gobiernu lo más ceo posible" y apoyó a Ferraz "pa que s'abran negociaciones que lleven a la formación de Gobiernu" y "desbloquiar la situación".
Coles mesmes, llamó a los otros partíos a "sacar conclusiones" de los resultaos d'esti 10 de payares y "tender la mano". Amás, el presidente asturianu quixo quitar cualquier culpa a Pedro Sánchez de la repetición electoral, de la qu'acusó namás a Ciudadanos y Podemos.
Per otru llau, a entrugues de los periodistes, el socialista quixo dexar claro que la situación nun condiciona les negociaciones que puedan abrise n'Asturies de cara a l'aprobación de los presupuestos autonómicos.
PUXU DE VOX
Barbón quixo tamién destacar qu'a pesar de la menor participación esti 10 de payares, el bloque de la esquierda y el de la derecha caltienen resultaos asemeyaos. Asina, la única variación que se produció ye'l la "realliniación completa" nes dereches pol "esbarrumbe" de Ciudadanos que "nutrió" al PP "y especialmente a la estrema derecha".
Una situación qu'al so xuiciu ye consecuencia del "erru grave" que tanto PP como Ciudadanos cometieron al negociar la formación de gobiernos autonómicos con Vox y da-yos responsabilidaes parllamentaries "mentes que nel restu d'Europa pon un gordón sanitariu a la estrema derecha".
Pal líder socialista, la situación llevó a que les dos formaciones "contaminárense" y al resultáu de Ciudadanos nesta convocatoria electoral, del que culpó tamién a la postura de "bloquéu" qu'al so xuiciu tomó la formación naranxa na llexislatura anterior.
Por eso, llamó al PP a cavilgar sobre'l so papel de cara al futuru con Vox y analizar "si ta dispuestu a realizar un gordón sanitariu a un partíu homófobu, xenófobu y qu'ataca los derechos de les muyeres". "La estrema derecha ye una amenaza pa la democracia", señaló.
AFITAMIENTU DEL "CAMBIU" NA FSA
El presidente asturianu empezó la so intervención poniendo en valir el trunfu de los socialistes nel Principáu, atropando'l 33,24% de los votos emitíos y sumando 184.062 apoyos. El porcentaxe de respaldu socialista ye prácticamente igual al del 28 d'abril nuna xornada na qu'amenorgó unos ocho puntos la participación.
Nesi sentíu, Barbón destacó que Pedro Sánchez ganó n'Asturies y n'España "d'una forma clara", polo que señaló que "dellos análisis falten a la verdá" y destacó l'apoyu municipal socialista na rexón, onde'l PSOE foi la fuercia más votada en 70 de los 78 conceyos asturianos.
Una situación qu'al so xuiciu muestra que'l procesu de cambiu realizáu polos socialista asturianos depués del XXXII Congresu valió pa "reconectar cola sociedá" y "atinar pa volver ganar l'enfotu de la xente". "Los oxetivos cumpliéronse", señaló Barbón sobre los resultaos de les elecciones d'esti 10 de payares.
