UVIÉU, 3 Jun. (EUROPA PRESS) -
L'asociación Iniciativa pol Asturiana refugó esti miércoles posibles cambios na toponimia oficial de Valdés. El presidente de l'asociación, Iván Llera, apuntó qu'esta midía de Política Llingüística, podría ser "la primera novedá en comparanza col Gobiernu anterior: un pasu atrás".
"Esta decisión ye un precedente mui negativu pa tol trabayu fechu hasta agora en materia de política llingüística, de recuperación y de normalización de los topónimos tradicionales", afirmó Llera al traviés de nota de prensa.
Iniciativa posiciónose asina depués de que'l plenu de Valdés reclamara al Gobiernu asturianu cambios nel llistáu de topónimos del conceyu --que'l mesmu plenu aprobó nel 2014--. Por eso, la Xunta de Toponimia --entidá encargada de fixar la toponimia n'Asturies-- va tener qu'estudiar agora si la capital del conceyu conserva la forma acastellanada de 'Luarca' xunto la forma tradicional 'L.luarca'.
"El casu de L.luarca ye un exemplu pa demostrar que nun se tan faciendo les coses bien pa la normalizar la toponimia y ye necesario facer una valoración d'esi trabayu", dixo Iván Llera, qu'apuntó que "ye sorprendente qu'esta midía de Política Llingüística, que ye la primera novedá en comparanza col Gobiernu anterior, sía precisamente un pasu atrás".
