UVIÉU, 21 May. (EUROPA PRESS) -
La música, coles actuaciones del grupu de pandereteros 'Cantaruxare', el grupu 'La Tarrancha' y José Manuel Tejedor, va tener el so protagonismu'l 30 de xunu na tercer edición de la Xira del Naranco depués de la so recuperación nel añu 2017.
L'Área de Participación Ciudadana d'Uviéu y l'Asociación 'Manos por el Naranco' presentaron esti martes la tercer edición de la Xira. El 30 de xunu foi la fecha escoyida pa celebrar la fiesta que pretende xunir nel Naranco a una montonera d'uvieinos nuna xornada cultural, deportiva y festiva, na que se pretende afalar y recuperar l'usu d'esti espaciu.
La Xira va principiar a les 11.30 hores en La Llosa, cola xubida de los romeros al Monte Naranco. Pa les persones que nun puedan realizar la caminata hasta la Xira, el Conceyu va poner un serviciu especial d'autobuses urbanos.
Una vez ellí, va haber animación infantil, foodtrucks, cuentacuentos, visites guiaes a elementos etnográficos del Naranco, deportes culturales, el tradicional Concursu de Pintura, y un Vermú en Danza col músicu Xosé Ambás, que va ser el maestru de ceremonies d'esta xornada festiva.
La Xira del Naranco celebróse pela primer vez el 7 de xunetu de 1929, llegando a axuntar 15.000 persones. La Guerra Civil supunxo un paréntesis na celebración hasta que nos años 60 volvió realizase pero ensin tanto éxitu. Tamién, nos años 80 hubo un intentu nuevu de recuperación. El 2 de xunetu de 2017, la Xira volvió realizase pa caltener l'espíritu festivu y social de la primera Xira de principios del sieglu XX.
