UVIÉU, 25 Feb. (EUROPA PRESS) -
Una muyer acusada de provocar graves mancadures a la so neña de cinco meses que ta na Unidá de Cuidaos Intensivos Hospital Universitariu Central d'Asturies (HUCA), en situación crítica, ingresó en prisión por homicidiu en grau de tentativa, según la decisión del Xulgáu d'Instrucción númberu 3 de Mieres.
El Tribunal Superior de Xusticia d'Asturies informa que, nel día d'ayeri, punxeron a trés persones a disposición xudicial. Depués de toma-yos declaración y d'alcuerdu col Ministeriu Fiscal, el maxistráu titular del xulgáu mentáu dictó un autu de prisión provisional comunicada y ensin fianza por homicidiu en grau de tentativa pa la madre del menor, que reconoció solmenar a la neña unos díes enantes, ensin poder esplicar la causa concreta de la situación.
La so pareya y la hermana de la so pareya, que comparten casa cola madre y la neña, quedaron en llibertá, pero siguen xuníos a la causa como investigaos y van tener que comparecer en sede xudicial los día 1 y 15 de cada mes.
Tanto la calificación del delitu, como la situación personal de los trés investigaos, pue modificase según avance la instrucción y la evolución médica de la menor.
El socesu foi la selmana pasada, pero nun trescendió hasta esti llunes. A la neña tuvieron que treslladala al Hospital Universitariu Central d'Asturies, n'Uviéu, pola gravedá de les mancadures.
