UVIÉU, 16 Nov. (EUROPA PRESS) -
L'escritor Pablo Texón esplica que 'Allumamientu', obra que-y fixo ganador del XXIV Premiu Xuan María Acebal de Poesía n'asturianu, ye una obra "unitaria" qu'espeya'l tiempu que va de la concepción d'un fíu "hasta'l momentu xustu enantes de nacer".
Ente les quince obres presentaes a esti premiu, el xuráu decidió conceder el gallardón al poemariu tituláu 'Allumamientu', destacando "la orixinalidá temática, asina como la destreza rítmica y la variedá estilística de los poemes, que-y permiten construyir una voz poética singular pa reflexonar sobre la paternidá dende una concepción esperiencial".
En declaraciones d'Europa Press, Texón esplicó que lo más destacable del poemariu ye la so "temática unitaria", con testos escritos en tiempos diferentes "pero con vocación d'unidá". Asina, l'autor buscar espeyar el tiempu ente la concepción d'un fíu y el segundu enantes de nacer.
Con too, según comenta Texón, en 'Allumamientu' hai variedá de sub-temes, como'l mieu, la dulda, la esperanza o l'amor. Mecíu con eso, poemes cola métrica de xuegos infantiles, "dalgo que-y va chocar al llector".
Otra manera, comenta qu'esta obra ye especial pa él al recoyer la so voz "más personal", porque siempre tento de dixebrar la voz poética de la personal "pero ye más difícil tapecer referencies pasaes al falar de paternidá".
Pablo Texón (Felechosa, 1977) ye ún de los escritores de más renome de les lletres asturianes y lleva agora ún de los premios más importantes de la poesia nel nuestru idioma; el Xuan María Acebal, un premiu que recibe con una "ilusión tremenda".
