UVIÉU, 20 May. (EUROPA PRESS) -
La Federación Socialista Asturiana (FSA) fixo públicu esti llunes el so programa electoral, un documentu de 70 páxines tituláu '400 midíes pa la meyor Asturies'. Ente los asuntos trataos ta la llingua asturiana, pa la que la candidatura liderada por Adrián Barbón apuesta por un modelu basáu "na protección, la voluntariedá y la non imperatividá".
El tema ta recoyíu na midida númberu 186, na que señala que ye necesario "protexer" la superviviencia del asturianu y el 'eonaviegu' (gallego-asturianu), que tán en peligru de desaparecer.
"Pa eso, dientro del marcu constitucional y la protección xurídica qu'ufre a les distintes llingües d'España, na llexislatura próxima Asturies tendrá va tratar el debate sobre la reforma del Estatutu y, polo tanto, del reconocimientu oficial de la llingua asturiana y l'eonaviegu (nel so ámbitu), buscando un modelu que se caracterice pola protección, la voluntariedá y la non imperatividá, construyíu sobre la base del alcuerdu y el consensu", señalen los socialistes asturianos.
Amás hai otres trés midíes que se refieren a la llingua asturiana y que tán nel so programa. Asina, comprométense a rematar la fixación de topónimos tradicionales respetando la voluntá de los conceyos.
El programa de Barbón tamién se compromete a sofitar el trabayu de l'Academia de la Llingua Asturiana y fomentar l'usu de la llingua asturiana nos medios de comunicación, especialmente na Radio Televisión del Principáu d'Asturies (RTPA).
CAMBIU DE POSTURA
Nel últimu Congresu de la Federación Socialista Asturiana (FSA), celebráu na seronda de 2018, producióse un cambiu nes files socialistes no que se refier a les sos intenciones sobre l'asturianu y la so posible oficialidá.
Nesi marcu aprobóse una enmienda a la ponencia marcu del Congresu que yera favorable a la oficialidá, camudando asina la postura tradicional de los socialista asturianos sobre esti tema. Lo que'l Congresu aprobó foi que l'asturianu (y nel so ámbitu, el gallego-asturianu) sía, xunto al castellanu, llingua oficial n'Asturies, nel momentu d'una reforma del Estatutu d'Autonomía.
