RUMA BARBERO. - Archivo
UVIÉU, 22 Oct. (EUROPA PRESS) -
La obra ganadora de la decimoprimer edición del Premiu Alfonso Iglesias de Cómic en llingua asturiana, 'Seltegu', del dibuxante Ruma Barbero, fala de la xira que fixo Felpeyu pel Líbanu nel 2005. Asina, el cómic va mostrar la historia del país al traviés de los güeyos de les persones coles que topa'l grupu na so xira per esti territoriu d'Oriente Próximu.
El premiu, convocáu y concedíu pola Conseyería de Cultura, Política Llingüística y Turismu del Gobiernu d'Asturies, tien una dotación de 5.000 euros, y ente les obres presentaes, el xuráu decidió conceder el premiu al cómic tituláu 'Seltegu', destacando que se trata de "una obra autobiográfica mui plástica y bien compuesta que domina los recursos narrativos del xéneru".
En declaraciones a Europa Press, Barbero esplicó que'l títulu del cómic vien d'un fechu real que pasó namás llegar al aeropuertu de Beirut. Ellí, el taxista unviáu pola Embaxada española taba esperándolos con un cartel onde podía lleese 'Seltegu' y non 'Felpeyu', el nome real del grupu.
"El cómic ta chiscáu de la historia del país a la vez que pasamos pelos sitios pelos que vamos tocar", esplicó Ruma, p'añadir qu'al traviés d'anécdotes reales quier mostrar un viaxe y tolo que toparon nun país con 17 minoríes relixoses y refuxaos palestinos. El dibuxante va a contrastar eses alcordances coles de los sos compañeros de Felpeyu "pa cargar de más verdá l'anecdotariu".
Barbero diz que llevar pela tercer vez l'Alfonso Iglesias --yá lo fixera con 'Manzajú' (2009) y con 'El viaxe a la lluz' (2015)--, supón un "arguyu", pero sobre too supón "una de les poques posibilidades de facer el trabayu que quies". Asina, comenta que facer una novela gráfica llarga supón muncho tiempu y dedicación. "Ensin ayuda ye imposible asumilo", sentencia.
Rumaldo Antón Barbero de Diego, Ruma Barbero, ye llicenciáu en Belles Artes y como autor de cómic tien ganao yá dos veces el premiu Alfonso Iglesias, poles obres 'Manzajú' (2009) y 'El viaxe a la lluz' (2015). Amás d'estos dos títulos, les sos últimes publicaciones nesta estaya n'asturianu son 'Aguantando cachones 2' (2016), 'Gaspar a tiempu completu' (2019) y 'Les 7 maraviyes de Xixón' (2019). Amás de la so faceta como autor de cómic, ye tamién diseñador y maquetador de llibros y discos, amás de miembru del grupu folk Felpeyu y lletrista pa munches formaciones asturianes.
