UVIÉU, 11 Dic. (EUROPA PRESS) -
El presidente del Principáu d'Asturies, Adrián Barbón, caltuvo esti miércoles un alcuentru con Arzobispu d'Uviéu, Jesús Sanz Montes na sede de Presidencia nel qu'analizaron distintes cuestiones y nel que dexaron patente la rellación bona ente Ilesia y Presidencia.
Enantes de la xunta, l'Arzobispu indicó que la de güei ye una "visita institucional, cordial y que nun ye por un asuntu concretu o puntual" y destacó la "mui bona sintonía" que caltién col presidente asturianu yá dende la so etapa como alcalde de Llaviana. "Barbón ye cristianu y ye políticu, non siempre ye fácil compaxinar dambes realidaes, pero nin una cosa pue condicionar la otra nin se deben romper les rellaciones bones", destacó l'Arzobispu.
Asina ente los asuntos a tratar nel alcuentru, Sanz Montes indicó que'l patrimoniu de la Ilesia que nun ye priváu ye una de les cuestiones a tratar porque "necesiten de l'ayuda del Principáu".
Indicó qu'entiende que nun son momentos fáciles pa los presupuestos pero incidió en qu'esperen que l'ayuda siga calteniéndose. Nesti sentíu refirióse al Prerrománicu asturianu, "una xoya qu'hai que caltener".
Tamién manifestó la necesidá de tratar los trabayos pendientes en Cuadonga y mostró'l so deséu de qu'esta Llexislatura sía la definitiva pa facer les soluciones que precisa la zona. "Nun ye una cuestión cenciella, por eso vamos siguir falando siempre con respetu y entendimientu", dixo.
