UVIÉU, 5 Dic. (EUROPA PRESS) -
La portavoz de Somos nel Conceyu d'Uviéu, Ana Taboada, anunció esti xueves gastos nuevos cargaos al Conceyu d'Uviéu pol alcalde, el 'popular' Alfredo Canteli referíos a otru viaxe a Madrid nel que volvió tar acompañáu de la so muyer. Trátase d'un viaxe del 22 de xunu a la capital, pa dir al Patronatu de la Fundación Princesa d'Asturies.
Taboada esplicó qu'esti viaxe supunxo pal erariu públicu un gastu de 537 euros y indicó que nesa ocasión Canteli volvió tar acompañáu de la so muyer y pasó la nueche nel mesmu hotel qu'en polémicu viaxe a Madrid por cuenta de la presentación del Menú del Desarme.
"Lo que queremos esplicar con esti viaxe nuevu ye que'l fechu inicial denunciáu por Somos Uviéu nun ye una cuestión aisllada sinón que ye dalgo repitío", esplicó Taboada qu'indicó y mostró les factures d'ese 22 de xunu nes que s'amuesa que'l rexidor uvieín tuvo acompañáu nel so agospiamientu, almuerzu y comíes por otra persona que-yos consta foi la so muyer".
Ana Taboada indicó que nesa ocasión les factures referíes a la mantención "nun foron pinchos, sinón comíes en toa regla" y indicó tamién, que pescudaron que l'habitación doble supón un gastu mayor que si s'optara por una individual.
"Tán cargándose gastos al Conceyu d'una persona que nun ye cargu públicu", insistió Taboada, que recordó que magar la so rectificación posterior, "de xuru encamentada por dalgún abogáu", Alfredo Canteli dixo mui claro nel Plenu que diba persistir na so conducta. Por eso dende Somos insistieron en que ye necesario la so dimisión y caltienen qu'amás van dir a los tribunales pa esclariar los fechos.
Amás, Ana Taboada volvió recordar que sigue habiendo una factura por aclarar, la referida a los 180 euros d'una cena celebrada en Madrid nel viaxe pa la presentación del Menú del Desarme, con otros trés persones de les que nun quixo dar la so identidá.
Sobre la posibilidá de qu'existan más viaxes nos que Canteli cargara al Conceyu gastos referíos a la so esposa, Taboada indicó que como oposición van siguir vixilantes y investigando pa que "l'alcalde dexe de confundir lo público colo privao"
