UVIÉU, 14 Oct. (EUROPA PRESS) - .
Los trés trabayadores de Vesuvius afectaos pol espediente de regulación d'empléu de la compañía que lleven enzarraos dende'l miércoles pasáu na Catedral d'Uviéu decidieron empezar esti llunes una fuelga de fame hasta que se solucione'l conflictu llaboral.
Asina lo confirmó a los periodistes el presidente del comité d'empresa, Juan Manuel Baragaño, enantes de participar nuna xunta nueva cola compañía pa negociar l'ERE n'Uviéu.
"Ye una midida dramática y reclamamos dende yá la intervención de les alministraciones local y rexonal pa solucionar esti conflictu; tán poniendo en peligru la so vida pa que se solucione la situación", dixo.
Vesuvius presentó'l día 12 l'ERE qu'afecta a les factoríes de Llangréu (Asturies) y Miranda de Ebro (Burgos). El periodu de consultes remata güei, anque dende'l Ministeriu d'Industria avanzaron esti llunes que se va a allargar hasta'l 18 d'ochobre.
Sicasí, los trabayadores dixeron que nun saben nada d'esi allongamientu. "Nós somos los que negociamos y tenemos qu'entrar nesa mesa a ver si se nos comunica dalgo", dixo Baragaño enantes d'aconceyar cola empresa.
