UVIÉU, 21 May. (EUROPA PRESS) -
La candidata de Foru a la Presidencia del Principáu d'Asturies, Carmen Moriyón, refirióse esti martes al mitin ufiertáu en Xixón pol presidente del Gobiernu en funciones y líder del PSOE, Pedro Sánchez, nel qu'animó a los suyos a nun dexar a medies la xera. "¿Vamos dexar que'l PSOE termine la so xera y dexe Asturies desindustrializada y despoblada como quier Pedro Sánchez?", preguntóse Moriyón.
Según la candidata, Sánchez vieno a Xixón a "rematar" lo que queda d'Asturies. "Yá sabemos cuálos son les consecuencies de les polítiques socialistes: güei conocemos qu'ArcelorMittal anuncia la mayor parada de les sos instalaciones en siete años, que va afectar a 500 trabayadores", llamentó nunes declaracione sen Siero.
Moriyón repitió, per otru llau, el so respaldu al proyectu del Área Metropolitana, que tien a Siero "como centru de gravedá", y abogó por reivindicar la meyora de les infraestructures de tresportes nesta zona central d'Asturies.
"La rede de cercaníes ta llamada a ser la forma más habitual de tresporte de la zona central y convirtióse en dalgo qu'avergüence depués de 30 años d'abandonu polos gobiernos socialistes: un tren con miles de servicios suspendíos al añu; una velocidá media de desplazamientu que namás aventaya a los peatones, y un nivel de accidentabilidá de récord", llamentó
"L'Hospital de referencia d'Asturies, el HUCA, nun tien apeaderu. L'aeropuertu nun tien apeaderu. Los polígonos industriales nun tienen apeaderu. Si tuviéramos un tren que xuniera El Bibio con Llamaquique muncha menos xente usaría'l coche. Esti tipu de situaciones güei nun pasen n'Europa. Namás pasa equí", añadió.
Por eso, y "con calter xeneral", defendió "la urxencia d'acabar les infraestructures porque dinamizan la economía, aselen el despoblamientu y mengüen la siniestralidá".
