BILBO, 18 (EUROPA PRESS)
AEK-k dagoeneko abian du datozen lau urteotan garatuko duen berdintasun plana, alfabetatze eta euskalduntze erakundearen eguneroko funtzionamenduan ikuspegi feminista txertatzeko asmoz. Planaren xede nagusia da erakundean ikuspegi feminista ezartzeko bideak urratzea, kideen aukera berdintasunean urrats sistematikoak emanez, hau da, berdintasuna bermatuko duten neurriak hartzea eta horiek AEKren eguneroko jardunean txertatuta geratzea.
Planaren oinarrian, joan den ikasturtean osatutako diagnostikoa eta erakundean bertan jasotako ekarpenak daude. Hurrengo lau ikasturteetan garatuko den plangintzaren bidez, hortaz, AEK-k xede hauek erdietsi nahiko lituzke: erakundeak eskaintzen dituen zerbitzu guztietan ikuspegi feminista txertatuta egotea; iruditegian zein komunikazioan, eta AEK-k antolatzen dituen ekimenetan, bikain aritzea; eta, azkenik, erakundearen
kulturan, egituran eta AEK-ko kideen lanaren nahiz bizitza familiarraren eta pertsonalaren antolaketan aurrerapauso nabarmenak egitea.
Planak zeharkako izaera dauka, eta erakundean bertan eratu den berdintasun batzordeak egingo du haren jarraipena. Alizia Iribarren AEKren koordinatzaile nagusi eta Berdintasun taldeko kidea 'Aizu!' aldizkarian adierazi duenez, "AEKn ez gara irla batean bizi; beraz, jendartean dauden eredu maskulinoak eta maskulinizatuak hartu ditugu, horrela bizi garelako, besterik gabe, ez AEK-k horren alde edo kontra egin duelako. Eredu maskulino horiekin jarraitzen dugu, eta horiek aldatzeko lanean ari gara".
