BILBO, 19 (EUROPA PRESS)
Asisko Urmeneta artista nafarrak asteazken honetan aurkeztu du 2020. urteko Euskal Herriko Itzulirako egin duen kartela, Euskadiko Artxibo Historikoan, Bilbon. "Zenbait kontzeptu bateratu nahi izan ditut: mekanika (tresnak, piezak), kateen eta plateren bidez irudikatutako 2020. urteari lotutako joko bat eta, hirugarrenez, Euskal Herriko aldapak", azaldu du artistak.
Eusko Jaurlaritzako Kultura eta Hizkuntza Politikako sailburu Bingen Zupiria eta Itzulia antolatzen duen Ocetako presidente Julian Eraso izan dira kartelaren aurkezpen ekitaldian, Urmenetarekin batera.
Bigarren urtez jarraian, Jaurlaritzako Kultura eta Hizkuntza Politika Sailak proposatuta, Literatura Lanaren Ilustrazioa modalitatean Euskadi Literatura Sariaren irabazleak egin du kartela. Era horretara, Gerra Zibilaren aurreko tradizio bat berreskuratu nahi da, garai hartan goi mailako euskal artistek egiten baitzituzten txirrindularitza lasterketaren kartelak.
Irudia sortzeko prozesuari dagokionez, Urmenetak azaldu du bizikleten mekanikari bat bisitatuz ekin ziola lanari. "Lehenbizi, bizikleten mekanikari baten tailerra bisitatu nuen eta zer material erabil nezakeen aztertu nuen. Ondoren, konposizioa osatzeko unea iritsi zen. Amaitzeko, argazki bat egin nuen eta ordenagailu bidez landu nuen", adierazi du.
Bestalde, Zupiriaak ekimenaren jatorria gogoratu du: "Ideia Antonio de Guezala margolariaren senitartekoekin egindako topaketa batean sortu zen. Hitzordu horrek Gerra Zibilaren aurreko tradizioa gogora ekartzeko balio izan zigun. Garai hartan goi mailako euskal artistak arduratzen ziren Itzuliaren kartelak egiteaz. Tradizio hura berreskuratzeko asmoa Itzuliaren antolatzaileei helarazi genien eta oso egokia iruditu zitzaien".
Ildo horretatik, sailburuak adierazi du ekimen horren bidez hiru helburu bilatzen direla: "Bide honi helduz talentu handiko euskal artisten belaunaldi bat gogora dezakegu, artea eta kirola uztartzen dituen tradizio bat berreskuratuz. Bestalde, euskal sortzaileei euren lana erakusteko eta ohikoa ez den publikoarengana heltzeko aukera berriak ematen dizkie. Azkenik, aukera hau baliatzen dugu Itzuliaren tradizioa eta ospea aldarrikatzeko, Itzulia goi mailako kirol proba baita".
Era horretan, iaztik hasita, Kultura eta Hizkuntza Politika Sailaren proposamen honen bidez eta Itzuliaren antolakuntzaren eskutik, urtero, euskal sortzaile batek lasterketa honetako kartela egiteko aukera izango du. Aurtengo Euskal Herriko Itzulia edo Basque Country Itzulia apirilaren 6an hasiko da, Eibarren, eta 11n amaituko da, Bilbon, sei etapatan banatuta euskal geografia osoa gurutzatu ondoren.
