BILBO, 15 (EUROPA PRESS)
Landa Eremuko Emakumeen Nazioarteko Egunaren 16. edizioa da astearte honetan, eta euskal geografiako toki desberdinetatik iritsitako 120 emakume inguru bildu dira goizean goiz, Durangoko San Agustin Kultur Gunean (Bizkaia), euren eguna ospatzeko eta landa eremuko gizartean zein lanaren esparruan duten rola goraipatzeko.
Eusko Jaurlaritzako Nekazaritza, Arrantza eta Elikadura Politikako Sailburuordetzak, Hazi Fundazioaren bitartez, eta Landa Eremuko Emakumeen Batzordeak antolatu dute topaketa, eta elkartzeko, eztabaidatzeko eta proiektuak aurkezteko gune bihurtu da, lan eremuetan garapen jasangarria eta berdintasunezkoa lortzeko, nahiz eta, adierazi dutenez, helburuan "aurrera egiten ari garen arren, oraindik asko dagoen egiteko".
Jone Fernández Eusko Jaurlaritzako Landaren eta Itsasertzaren Garapeneko eta Europar Politiketako zuzendaria, Ima Garrastatxu Durangoko alkatea eta Maite Peñakoba Bizkaiko Foru Aldundiko Nekazaritzako zuzendaria arduratu dira jardunaldia inauguratzeaz.
Guztiek adierazi dute emakumeek duten rola "funtsezkoa" dela lurraldean mantentzeari eta iraunkortasunari dagokionez, eta gaineratu dute beharrezkoa dela hasitako bidean jarraitzea, erabaki eta gobernu organoetan eragin handiagoa lortzeko.
'ZUHAITZA'
Bestalde, Landa XXI landa eremuko emakumeen eta familien interesak defendatzeko, ordezkatzeko eta sustatzeko elkarteak 'Zuhaitza' lana aurkeztu du, jardunaldirako berariaz prestatua. Landa eremuko hainbat emakumeren lanak, bizipenak, hausnarketak, helburuak eta ilusioak biltzen ditu irudi eta hitzen bitartez, hainbat belaunaldi kontuan hartuta, amamengandik bilobenganaino. Argazki erakusketa eta bideo baten
bitartez aurkeztu da lana.
Halaber, ekitaldira gonbidatutako elkarte moduan, Colletero elkarteak hartu du parte jardunaldian. Elkartea Errioxako Nalda herrikoa da, emakumeek gidatzen dute, eta hainbat lan esparru lantzen ditu, udalerriaren egoera sozial eta ekonomikoa hobetzeko; hori guztia, autogestio, parte hartze, prestakuntza, enplegu, dinamizazio eta ekimen txikietarako laguntasunaren bitartez, 1.000 biztanle inguru dituen herrixka horretako pertsona guztiak kontuan hartuta.
Azkenik, Jorge Garbisu Eusko Jaurlaritzako Nekazaritza eta Abeltzaintza zuzendariak Landa Emakumeen Estatutua guztiz inplementatzeko egiten ari diren azken pausoen berri eman du: Estatutua 2015ean onartu zuen Eusko Legebiltzarrak, eta legearen helburua da emakumeek lehen sektorean eta landa ingurunean duten lan egoera arautzea, emakume nekazarien lana ikusgarriago bihurtzeko, erabakiak hartzeko prozesuetan parte hartzea sustatzeko eta ustiategien titulartasuna lortzeko helburu nagusiarekin.
