BILBO, 18 (EUROPA PRESS)
Kontsumobide Kontsumoko Euskal Institutuak gomendatu du inauterietan "dibertsioa segurtatzea" eta, horretarako, mozorro jantziak "ahalik eta seguruenak" izan behar direla azpimarratu du. Aldizka erabiltzen direnez, mozorro jantziak gutxiago irauten duten materialekin edo beste jantzi batzuen txatalekin fabrikatuta daudela adierazi du, eta, hortaz, komeni dela "adi ibiltzea jantzien segurtasunarekin".
Kontsumobidek jakinarazi duenez, beti aukeratu behar dira suaren kontrako erresistentzia duten materialez egindako mozorro jantziak, Europako araua betetzen dutenak; horretarako CE ikurra eraman behar dute. Karetak edo antzekoak erabiltzen badira, komeni da burua osorik estaltzen ez dutenak aukeratzea, eta beti ziurtatu behar da nahikoa zulo dituztela arnasa hartzeko. Ezinbestekoa da beti etiketa ondo begiratzea fabrikazio materialak ziurtatzeko eta alergia posibleak, urratuak eta abar prebenitzeko.
Mozorro jantziak 12 hilabetetik gorakoentzako eta 14 urtetik beherakoentzat direnean, jostailu gisa sailkatzen dira, eta eskakizun zorrotzagoak bete behar dituzte. Etiketa arretaz begiratu behar da beti, eta ziurtatu mozorro jantzia adinerako egokia dela. Suaren kontrako ahalik eta erresistentzia handiena duten materialak bilatu behar dira, bai eta mozorro jantziek xehetasun txikiak ez edukitzea, askatu eta ahora eraman daitezkeelako, eta lokarriak ez edukitzea txanoetan edo lepokoetan, ustekabeko itoaldi bat eragin dezaketelako.
Makillajeen kasuan, nahitaezkoa da ziurtatzea iraungitze data erreakzioak prebenitzeko, bai eta konposizioa ere, larruazaleko erreakzio deserosoak saihesteko. Makillajeetan zein tindagaietan egiaztatu egin behar da urarekin garbitzeko modukoak direla.
Kontsumobidek gomendatu du hurbileko eta konfiantzazko dendetara joatea, segurtasun berme gehigarri bat izan daitekeelako. Sarean erosita ere hartu behar dira kontuan gomendio hauek guztiak: sarean erosten denean beti dago 14 eguneko epea erosketan atzera egiteko (betiere mozorro jantzia ireki eta erabili ez bada), arrazoirik eman behar izan gabe.
