BILBO, 16 Feb. (EUROPA PRESS) -
Euskal Herriko Unibertsitateko (EHU) Informatika Fakultateak eta Innovae enpresak hitzarmen bat sinatu dute, Innovae enpresa gela martxan jartzeko. Akordioari esker, ikasleek errealitate areagotuaren eta birtualaren sektorera bideratu ahalko dute beren karrera profesionala, eta euren prestakuntza osatu eremu horri buruzko hitzaldiekin, mintegiekin, curriculumetik kanpoko praktikekin edo gradu amaierako lanarekin.
EHUk jakinarazi duenez, Innovae enpresa liderra da ingurune industrialerako errealitate areagotuko eta birtualeko soluzioen garapenean, eta 16 urte baino gehiagoko esperientzia dauka hainbat sektoretan teknologia horiek dituzten proiektuak ezartzen. Bere sistemak erakundeetako eremu kritikoetan eraginkortasuna hobetzeko eginak daude, besteak beste, prestakuntza, mantentze lanak eta prozesuen kontrola.
Bere errealitate areagotuko eta birtualeko soluzioak prozesu gidatuetan, Digital Twin teknologian, telelaguntzan eta murgiltze esperientzietan oinarritzen dira, eta, horiei esker, enpresek euren lan indarra sendotu, profesionalen trebakuntza optimizatu eta fabrikazio prozesuen eraginkortasuna areagotu dezakete.
EHUko Informatika Fakultateak eta Innovaek ikasleei errealitate areagotuko eta birtualeko teknologiak hurbiltzeko eta 4.0 Industriaren testuinguruan talentu gazteen prestakuntzan era aktiboan laguntzeko duten konpromisoagatik izan da posible hitzarmena egitea.
Prestakuntzaz gain, Eywa Space inkubagailuaren bitartez, Innovaek era aktiboan sustatzen du ekintzailetza, bai eta enpresa berriak sortzea ere. Eywa Space-k aukera ematen du errealitate areagotuarekin eta birtualarekin lotutako negozio ideiak enpresa arrakastatsu bihurtzeko. Horretarako, ekintzailetzak dakartzan arriskuak murrizteko diseinatutako metodologia aplikatzen du. Halaber, mentoring ez ezik, negozio plana garatu ahal izateko laguntza teknologikoa eta finantza laguntza eskaintzen ditu Eywa Space-k.
