DONOSTIA, 3 (EUROPA PRESS)
Sharunas Bartas, Naomi Kawase, François Ozon eta Thomas Vinterberg zinemagileak Donostia Zinemaldiaren 68. edizioko Sail Ofizialean lehiatuko dira, eta Dea Kulumbegashvili eta Takuma Sato zuzendari berrien lanak ere ikusi ahalko dira sail berean, zinemaldi donostiarretik ostiral honetran jakinarazi dutenez.
Sharunas Bartas (Siauliai, Lituania, 1964) Cannes, Berlin, Venezia eta Locarnoko jaialdietan esperientzia duen autorea da, eta 'Frost' (2017) eta 'Eurazijos aborigenas / Eastern Drift' (2010) filmak zuzendu ditu. Irailean Donostiara itzuliko da, 'In The Dusk' filma mundu mailan estreinatzeko. Bigarren Mundu Gerraren ondoren Lituaniako okupazio sobietarraren aurkako mugimendu partisanoaren borrokari buruzko drama bat da.
Halaber, Naomi Kawasek (Nara, Japonia, 1969) maiz parte hartu du Donostia Zinemaldian, eta, aurten, Urrezko Maskorra eskuratzeko aukera izango du berriz ere, 'Asa Ga Kuru / True Mothers' filmarekin (lehen aldiz proiektatuko dute Europan). Bi ama -bata biologikoa eta bestea adopziozkoa- aurrez aurre jartzen dituen mikrokosmos familiarraren esplorazio berri bat da.
Zinemagile japoniarra 'Genpin' (Fipresci Saria, 2010) eta 'Vision' (2018) filmekin lehiatu da Donostiako Sail Ofizialean, eta bere filmak Perlak sailean eta '.doc - Ez-fikzioaren bide berriak' (2010) eta 'Japoniako zinema independente berria 2000-2015' (2015) atzera begirakoetan ere ikusi ahal izan dira.
Gainera, Dea Kulumbegashvili (1986) gazte georgiarrak bere film laburrak estreinatu zituen Cannesko zinemaldian eta Errealizadoreen Hamabostaldian, eta 'Dasatskisi / Beginningfilm' lan luzearekin egingo du debuta. Filma Donostian proiektatuko da lehen aldiz mundu mailan, eta Jehovaren lekuko batek eta bere familiak talde estremista batengandik eta herri georgiar urrun bateko poliziarengandik jasaten duten jazarpena kontatzen du.
FRANÇOIS OZON
Bestalde, François Ozon (Paris, 1967) ere Sail Ofizialera itzuliko da. Urrezko Maskorra eta Gidoi Onenaren Epaimahaiaren Saria irabazi zituen 'Dans la maison' (2012) filmarekin, eta, besteak beste, 'Sous le sable' (2000), 'Le refuge' (Epaimahaiaren Sari Berezia, 2009) eta 'Une nouvelle amie' (2014) filmekin lehiatu da. Errealizadoreak Zabaltegin proiektatu zuen bere lehe lana ('Regarde la mer', 1997), eta 'Été 85 / Summer of 85' lanarekin lehiatuko da aurten; nerabeen maitasunei buruzko kontakizun bat da, 1980ko hamarkadarekin nostalgikoa erabat.
Halaber, Donostia Zinemaldiak Takuma Sato (Akita, 1989) japoniarraren bigarren film luzea estreinatuko du mundu mailan. 'Don't Say That Word!' (2014) filmari esker, hainbat sari jaso ditu Tokioko Pia zinema jaialdian eta Busango nazioarteko jaialdian. Bere lan berriak, 'Nakuko wa ineega / Any Crybabies Around?' izenekoak, Urtezahar gauean biluzik eta mozkortuta korrika ari zela telebistak grabatu zuen gizon baten bizitzak izan duen aldaketa kontatzen du.
Azkenik, Thomas Vinterberg (Kopenhage, 1969) azken hamarkadetako Danimarkako zinemagile adierazgarrienetakoak 'Druk / Another Round' filmaren Europako estreinaldiarekin parte hartuko du Zinemaldian. 'Jagten' filmean bezala (2012), Mads Mikkelsen aktorea da protagonista.
'Festen' (1998) filmaren egileak esperimentu bitxi batean murgildutako hainbat irakasleren bizitza kontatzen du lan berrian: lanaldian zehar intoxikazio etiliko maila bera mantentzea lortzen badute, euren buruak zabaldu, eta sormena areagotuko dutela uste dute.
Donostia Zinemaldiak 68. edizioko Sail Ofiziala osatuko duten gainerako lanen berri emango du datorren astean. Jaialdia irailaren 18an inauguratuko du 'Rifkin's Festival' filmak (lehiaketaz kanpo), Woody Allenek zuzendutako komedia erromantikoak.
