SANTIAGO DE COMPOSTELA, 27 Nov. (EUROPA PRESS) -
España e Portugal conectarán as súas redes de investigación mediante 150 quilómetros de fibra escura --fibra óptica xa instalada, pero non utilizada-- que se despregará entre Santiago e a fronteira co país luso, en Tui (Pontevedra).
Así o anunciou hoxe o presidente da Xunta, Emilio Pérez Touriño, na rolda de prensa posterior á reunión semanal de conselleiros, na que se autorizou un convenio entre a Consellería de Innovación e Industria e os ministerios de Ciencia e Innovación e Industria, Turismo e Comercio.
Mediante unha inversión total de 3,4 millóns de euros, da que o departamento que dirixe Fernando Blanco achegará o 30 por cento, uniranse a Rede Académica e de Investigación Española (RedIRIS), a Rede de Ciencia e Tecnoloxía de Galicia (RECETGA) e a Rede Académica e de Investigación Portuguesa (RCTS).
Segundo indicou o máximo mandatario galego, trátase dunha actuación "moi relevante" e que formaba parte das demandas das tres universidades galegas, así como das portuguesas --baseándose no Acordo de Cooperación Científica e Tecnolóxica entre os dous estados--, posto que servirá para impulsar proxectos transfronteirizos.
Ademais, o despregamento da rede permitirá potenciar a colaboración en materia de investigación, desenvolvemento e innovación e fará posible a creación de "polos de excelencia" en torno aos centros de I+D xa existentes ou que se cren no futuro.
De momento, comunicará os puntos establecidos no Centro de supercomputación de Galicia (CESGA), situado en Santiago, co Campus de Vigo e a fronteira con Portugal, de modo que garantirá a "axeitada conectividade" coas redes internacionais.
INFRAESTRUTURAS DE INVESTIGACIÓN
Por outra banda, o Consello da Xunta tamén deu luz verde á sinatura dun convenio entre a Consellería de Educación e as tres universidades galegas co fin de "desenvolver e consolidar" as infraestruturas científico-tecnolóxicas e os servizos de apoio á investigación.
Para iso, o departamento que dirixe Laura Sánchez Piñón achegará 1,4 millóns de euros, dos que case 392.000 euros se destinarán á Universidade da Coruña; máis de 431.133 euros irán á de Vigo; e os case 627.000 euros, á de Santiago de Compostela.
