SANTIAGO DE COMPOSTELA, 23 Oct. (EUROPA PRESS) -
O secretario xeral de UGT-Galicia, José Antonio Gómez, e da Federación galega de Industria, Construción e Agro, Javier Carreiro, visitaron este mércores aos traballadores de Endesa que se encerraron nas Pontes (A Coruña) como símbolo de protesta pola "paralización da negociación do convenio colectivo".
Nesta visita, os membros de UGT criticaron "o bloqueo e a intransixencia" da dirección da compañía eléctrica, que teñen a "única pretensión" de "precarizar as condicións laborais e de recortar os dereitos dos empregados".
Tanto Gómez como Carreiro consideran que despois de dous anos de "negociacións" e máis de 90 "reunións infrutuosas", "a chantaxe ao persoal é cada vez máis incisiva" e a compañía "pecha calquera camiño de solución ao conflito".
Polo momento, os traballadores encerráronse de forma indefinida e esta mesma actuación "está a sucederse en varias centrais de Endesa" para que se "abran canles de solución ao conflito", declararon dende o sindicato.
Así mesmo, UGT instou á Xunta e ao Goberno central a acometer un traballo conxunto para evitar que a térmica pontesa peche e, ao mesmo tempo, se opte por unha "transición enerxética xusta" que non "deixe a ninguén no camiño".
Cren que "hai alternativas e solucións", como a que esta mesma xornada se realizou na central. Unha proba técnica para a substitución do "40 por cento do carbón por outros combustibles", que deron como resultado "unha alternativa viable".
Ante esta posible solución, UGT afirma que a empresa "non pode seguir escudándose nun posible peche" porque "está demostrado" que existen outras opcións.
