A CORUÑA, 23 Oct. (EUROPA PRESS) -
O parque de bombeiros da localidade coruñesa de Santa Comba entrará en funcionamento antes de que finalice este ano, segundo lle confirmou o presidente da Deputación da Coruña, Salvador Fernández Moreda, ao alcalde da localidade, José Antonio Ucha, durante a reunión de traballo que mantiveron a mañá de hoxe na sede da institución provincial.
O custo total do parque de bombeiros de Santa Comba ascendeu a 1,5 millóns de euros, entre o gasto de construción do edificio, o equipamento e o parque móbil. Del total do presuposto, a Deputación da Coruña achegou o 60 por cento, mentres que o 40 por cento restante corresponde á Xunta de Galicia.
Fernández Moreda comentoulle ao alcalde as previsións do Consorcio Provincial de Bombeiros que pasan pola apertura das instalacións de Santa Camba antes de que finalice este ano. Na actualidade, as obras están moi avanzadas, e para o próximo xoves está prevista unha reunión entre os técnicos do Consorcio, do Concello e da empresa construtora para ultimar algúns detalles do proxecto.
O Consorcio Provincial de Bombeiros xa dispón do equipamento que levará o parque e o persoal adscrito a este está a realizar os cursos de formación e especialización. En total, serán 18 persoas as que conformen o equipo do parque de Santa Camba, que disporá tamén dun vehículo de extinción e rescate de altura, dunha autobomba nodriza de saída, e dunha autobomba de primeira intervención.
O parque comarcal de bombeiros de Santa Comba prestará servizo a unha área xeográfica integrada polos municipios de Santa Comba, A Baña, Mazaricos e Negreira, cunha superficie total de 604 quilómetros cadrados, e unha poboación estimada en máis de 30.000 habitantes.
