FERROL, 5 Jun. (EUROPA PRESS) -
O fotógrafo ferrolán Gabriel Tizón resultou o gañador do XVI Certame Medio Ambiente, organizado polo Ateneo Ferrolán, coa instantánea 'Arde Galicia', según deu conta o xurado ás 20.00 horas, coincidindo co Día Mundial do Medio Ambiente, no que tamén se inaugurou a mostra con 50 fotografías que recollen diversos aspectos da natureza, desde a súa beleza ao ataque por parte da man humana.
O primeiro premio do concurso está dotado con 900 euros; mentras que o segundo, de 300 euros, foi para o bilbaíno Asier Castro de la Fuente por 'Néboa con farola'; e o terceiro, dotado con 150 euros, recaeu en 'Cores agresivas' de Kiko Arcas García (Vigo).
A esta XVI presentáronse ó redor de 25 fotógrafos cunhas tres fotos cada un, e a mostra itinerante, pola súa banda, rematará en Ourense e conta con traballos procedentes non só de España, senón que tamén do estranxeiro, coma Portugal ou Alemaña.
O xurado estivo formado por Pedro José Lugrís Fernández, José Benito Cancio e, representando ao Ateneo Ferrolán, Eliseo Zaera Ríos. Cristina Meizoso Alonso actuou como secretaria do xurado, pero sen voto.
CAMPAÑA ESCOLAR
E tamén con motivo do Día Mundial do Medio Ambiente, Radiofusión en colaboración co Concello de Fene (A Coruña) organiza o concurso '¿Que podo facer eu para lograr un Fene máis limpo?', destinado aos escolares.
Os participantes poderán entregar os seus traballos ata o 15 de xuño e neles teñen que explicar por medio dun lema e unha redacción de aproximadamente 10 liñas as súas ideas para mellorar o municipio.
Con esta campaña educativa preténdese "contribuír a inculcar entre os máis novos e novas hábitos de respecto polo medio ambiente, fomento da reciclaxe e reemprego de materiais, reducción na producción de lixo...". O gañador que se dará a coñecer a finais de curso terá como premio unha viaxe nun camión de recollida de lixo, ademais dun lote de libros e discos.
