SANTIAGO DE COMPOSTELA, 9 Ene. (EUROPA PRESS) -
A Escola Universitaria de Relacións Laborais lucense da Universidade de Santiago (USC) convoca o I Premio de Estudos sobre as Relacións Laborais Fundación Campus Universitario de Lugo con motivo da celebración do décimo aniversario da súa creación.
O galardón, que contará cunha dotación económica de 1.000 euros, está aberto á participación de graduados sociais e diplomados en Relacións Laborais por calquera universidade española. O seu obxectivo é premiar aos mellores traballos sobre calquera materia relacionada co ámbito de actuación destes diplomados.
Os interesados en participar neste certame deberán remitir o seu traballo á Escola Universitaria de Relacións Laborais de Lugo antes do 15 de marzo de 2006. Unha vez rematado o prazo de recollida de traballos, o xurado fará público o seu dictame o 18 de abril, e posteriormente, a entrega do premio terá lugar durante a celebración do acto de clausura do presente curso académico.
O tribunal encargado de determinar o traballo gañador do certame, que estará formado polo equipo directivo desta Escola e a comisión organizadora do décimo aniversario, valorará a calidade, orixinalidade e contido dos traballos presentados.
As bases desta convocatoria, a través da que se pretende fomentar o interese e o coñecemento da actividade dos diplomados en Relacións Laborais, pódense consultar na web www.relacioneslaboraleslugo.com.
